Hier unsere Songtexte zum Mitsingen bei unseren Auftritten oder sonstwo. Wir veröffentlichen unsere Songs nach und nach auf Spotify, Amazon, Apple & Co. Die direkten Links zu den bereits verfügbaren Titeln findet ihr hier.
Neppeser Tälche
Alles op Anfang
Krümmelmonster
Et kütt wie et kütt
Fluss d’r Zigge
Jeck wie nie
Su schön
Fleeje
Koelsch Bloot
Lömmelömm
Alles Joode
Marie
—
Neppeser Tälche
© Sandra und Marc Dorlöchter, 2024
Musik: Spotify, Amazon, Apple & Co.
Mer hänge av em Neppeser Tälche
Pläsier un Verzällcher
de janze Dach
un wenn do wells och bei Naach
28 Grad un noh jet mieh
de Bud ungerm Daach, ich kann nit mieh.
Flöck zom Kiosk op dr Eck
Ich bruch Kölsch, e köhl Sixpack.
Kölsche sin nit jän allein zo Hus,
hol de Picknickdeck erus.
Janz Neppes weiß, wo Minsche sin
do jon mer hin.
Mer hänge av …
Flaniere un spaziere, fiere un pussiere
Lück, die sich kenne. Em Sönnche penne.
Möpps sinn am belle, dä Pap deit grille
Met Stock un Hot. Et jeiht uns jot.
Pänz un Spillche, Kääl, Mamsellche,
Neppeser Tälche.
Medden em Veedel,
Wo eins der Rhing si Bett hatt,
Litt jetz en Wiss wie en Hängematt,
Zwesche all de Hüsjer un dem ahle Hoff.
Mer hänge av...
—
Alles op Anfang
© Sandra und Marc Dorlöchter, 2023
Musik: Spotify, Amazon, Apple & Co.
Alles still un dunkel .
Dr Dag is noh jung.
Wat weed mich hück erwaade?
Mach mer kein Sorg, mach mich parat.
Alles jesinn, wat sull mer mache?
Hat ech jejläuv dat wör mi Ding.
Häs do die Liebe ad jefunge?
Han op dr schmucke Prinz jewaat.
De Sunn jeit op. Et weed hell!
De Sunn jeit op. Et weed wärm.
De Sunn jeit op. Duff en dr Luff.
Alles op Anfang.
Wat sull dat dann he bedügge?
Han mer dat anders vürjestallt.
Wer hinge stund, es jetz janz vürre
In 3 Dag op de Kopp jestallt.
De Sunn jeit op…
Stonn op, mer jonn dem Leech entjäje.
Wo Leid un Sorge nit mie zälle.
Wo Liebe üvver allem steiht.
De Sunn jeit op..
—
Krümmelmonster
© Sandra und Marc Dorlöchter, 2022
Stunds an der Thek in minger Weetschaff,
Wors einfach do, häs mich anjesinn.
Vürher nit jekannt un doch vertraut.
Met Rüschehemb un Hot un Dolch jeschmück
Häs do ming Hätz jekapert en nem Augebleck.
„Kein Kekse, ävver Kölsch“ häss do jesaat
Un mer eins metjebraat.
Wild jedanz un vill jelaach,
Han de Naach zom Dag jemaht.
Krümmelmonster sök Pirat:
Anfang dressig, janz charmant un jot parat.
Krümmelmonster sök Pirat: Dat wor mih als Zofall, dä uns zosamme braht.
Kölsche Tön de janze Naach, de Zick sching still zo stonn.
Kein Jedanke dran no Hus zo jonn.
E Bützje nor am nächste Morje,
Dann han mer uns verlore.
Krümmelmonster sök Pirat…
Un ich lauf, lauf, lauf
Met minger Zettel durch de Stadt.
An jeder Ecke, Latään
Han ich en anjebraht.
Un ich lauf, lauf, lauf
Bis an et Engk dr Welt,
Weil ich mir sicher bin,
Dat mir uns widdersinn.
Krümmelmonster sök Pirat…
—
Et kütt wie et kütt
© Sandra und Marc Dorlöchter, 2021
Alles op dr Welt kütt wie et kütt ,
Ov et dir jefällt oder och nit
Alles hätt sing Zick,
Lääv dr Augebleck!
Manchmal musst do kriesche,
Kanns morge widder laache.
Nit alles kanns do flicke,
Da kannste nix mie mache.
Hück wulle mer nit küme,
Loss mer leever danze.
Uns endlich widder bütze,
Noh allem Avstand halde.
Jetz es de Zick zom Levve
Un irjendwann zom Stirve.
Weed ich mi Hätz verliere?
Kann ich di Hätz jewinne?
Alles op dr Welt kütt wie et kütt ,
Ov et dir jefällt oder och nit
Alles hätt sing Zick,
Lääv dr Augebleck!
Mach keine Stress, leever jemötlich.
Alles relaxed, janz hösch.
Woför määst do dich verröck?
Der Moment kütt nit zoröck.
Jede Morje jeiht et Sönnche op,
Jede Ovend jeiht et unger,
Ejal war dir un mir es jot gelunge .
Dr Lauf dr Welt han mir nit bestellt,
Nor de Liebe zällt mih als Jold un Jeld.
Der Schnei vun jester schmilz in dr Sunn vun morje.
Alles op dr Welt…
—
Fluss d’r Zigge
© Sandra und Marc Dorlöchter, 2020
Wasser fleeß ad immer de Rhing erav,
Künnt uns su vill verzälle,
Wor ad do als dr Dom noh nit stundt,
Domols in Claudia Colonia.
Hück stonn ich he an de selve Stell
Wie Römerlück, Franzusmamsell.
Nix bliev wie et wor,
Nor de Rhing wor emmer ad do.
Mer jehüre zosamme
domols wie hück, wat och passeet.
Gemeinsam stonn mer för Kölle
in Liebe zom Dom un zom Rhing.
Wasser fleeß noh emmer de Rhing erav,
Jitt uns Kölsche et Lävve.
Us aller Welt kumme Minsche zo Dir,
Us alle Länder un Zigge.
Hück stonn ich he, luur mich staunend öm.
jonn vum Aldermaat zor Domplatt hin.
Nix bliev wie et wor,
Nor de Rhing dä wor immer ad do.
Mer jehüre zosamme ..
Em Fluss dr Zigge blievs do immer do,
Vür all de Minsche blievs do immer do.
Kölle am Rhing.
Mer jehüre zosamme …
—
Jeck wie nie
© Sandra und Marc Dorlöchter, 2019
Kölle Family – et jeit loss, mer sin he !
Kölle Family – mer sin jeck wie nie!
Ich han ene Kääl un 3 Pänz zo Hus
Bei uns is immer jet loss.
Mer dun jään laache un mache Stuss
Uns kloppe künne mer och.
Kölle Family ..
Opjepasst, mer hann han Spass,
Un fiere et Lävve!
Uns Mission – Intonation –
Passt Schon – Eskalation.
Laut und bunt jeiht et rund
En uns Famillich,
Jetz spille mer für üch!
Kölle Family …
Mer jläuve an de leeve Jott
Hä es immer bei uns!
Dröm mache mer Musik – Let it rock
Kölsche Tön un ming Trumm
Kölle Family …
—
Su Schön
© Sandra und Marc Dorlöchter, 2019
Musik: Spotify, Amazon, Apple & Co.
Dr Frisör op dr Eck,
Dä määt mich esu …. schööön!
Beim Frisör op dr Eck,
Do bin ich su jään.
Dä hätt en Schir,
Die es esu heiß,
Un hä weiß,
Wat keiner suns weiß.
Dä höt Dir zo,
All de Lück wie ich un do.
Verzällcher klein un jroß,
Vun Hottfollee ov vun de Stroß.
Dr Frisör…
Us de aal Tant määt hä en Diva,
Zottelsköpp weede schmucke Wiever.
Hääre losse sich stutze öm besser zo bütze.
Un wer sich hätt verlore, föhlt sich wie neu jebore.
Dr Frisör…
Eiaiaia, heiße Schere – wunderbar!
Eiaiaia, heiße Schere – do määs mich esu schön!
Eiaiaia, heiße Schere – wunderbar!
Eiaiaia, heiße Schere – do kenns vun mir jedes Hor!
Ov fussich, ov brung,
All bringk hä in Schwung.
Ov koot, ov lang,
Für nix es em bang.
Och lockig Hor
Määt hä wunderbar.
Un wer noh Wünsch hätt offe,
Kann op Erfüllung hoffe!
Dr Frisör…
—
Fleeje
© Sandra und Marc Dorlöchter, 2019
Musik: Spotify, Amazon, Apple & Co.
Ich ben voll normal,
Janz jenau wie Du.
Jede Dag banal,
Bin och jlöcklich av un zo.
Ming Huus, mi Boot, mi Jlöck,
Levver vür, nit zoröck.
De Draum, dä ich jedräump,
Fass hätt ich en versäump!
Doch dann koms do, häss mich anjesinn.
Jetz is nix mie wie et wor.
Ich künnt fleeje bes zum Horizont
Einfach fleeje, wie ne bunte Luffballon.
Loss mer fleeje, wie ne Adler wild un frei:
Nur dr Wind dräht uns zwei.
Ejal wie lang de Naach,
Luur en de Speejel un laach.
Sulang et Hätz noh schleiht,
Wohin dr Wind uns dräht.
Un dann koms do, häss mich anjesinn.
Jetz is nix mie wie et wor.
Ich künnt fleeje …
Jede Dag verdeent die Chance ne joode zo weede.
Loss mer de Feste fiere wie se falle.
Dr Moment is kossbar un kütt nie zöröck,
wat zällt is jetz de Augenbleck!
Ich künnt fleeje …
—
Kölsch Bloot
© Sandra und Marc Dorlöchter, 2018
Musik: Spotify, Amazon, Apple & Co.
Sunnesching em Hätze, et Hätz om räächte Fleck.
Fiere un laache, ejal met welchem Jeck.
Ding Ärm sin wigg un offe, lädt uns all en
dat Levve zo lävve un Freud daran zo han.
Do häss mich längs verzaubert, ming Siel gehört zo Dir.
Ich han kölsch Bloot!
Do deihs mir joot,
Ming Stadt, wo ich jeboore bin.
En mir fleeß kölsch Bloot,
Dat deiht mir joot.
Durch Dich un för Dich, nur he
Han ich mi Levvenselixier.
In Kölle steihst do op, „Arsch huh“ es nit nur e Wood:
En x bliev en x, weed kein U drus jemaat.
Brings ding Lück op Trapp, he bliev keiner allein.
Ejal welche Liga, mer lieben unsre Verein!
Do häss uns all verzaubert, uns Siel jehört zo Dir!
Mer han kölsch Bloot!
Do deihs uns joot,
Uns Stadt, wo mer jeboore sin.
En uns fleeß kölsch Bloot,
Dat deiht uns joot.
Durch Dich un för Dich, nur he
Han mer uns Levvenselixier.
Et es drissejal,
Woher do herküss,
Un wer do bes,
Vür de Herrjott sin mer all jlich.
Kanns Do et föhle?
Et jilt och för Dich:
Mer han kölsch Bloot!
Do deihs uns joot,
Ejal wo mer jebore sin.
En uns fleeß kölsch Bloot,
dat deiht uns joot.
Durch Dich un för Dich, nur he
Han mer uns Levvenselixier.
—
Lömmelömm
© Sandra und Marc Dorlöchter, 2018
Em Kindergaade han mer zwei uns ad jekannt.
Sin op de Bäum erop, durch Matsch un Dreck jerannt.
Zosamme en dr Schull, Pech un Schwefel wor‘ mer zwei.
Woodt de Lehrerin jefopp, wor‘ mer jän dobei.
Em Hüüsje huh im Baum, dat war ene Draum,
soße mer jään röm, drunke Lömmelömm ,
de Zick schien still zo stonn, nie no Hus mie jonn:
ich un du, un du un ich, mer sin unzertrennlich!
Kumm drink met mir en Lömmelömm.
Gemeinsam jeiht de Zick doch vill besser röm.
Kumm, hok dich ein, stonn nit eröm.
Ich jonn met dir durch Dick un Dünn, janz ejal wohin.
Kumm drink met mir – en Lömmelömm.
An de Hohenzollernbrück hänge all de Schlösser.
Frog mich, wievill Lück dovun dun sich hück noh jröße?
Han kaum gemerk wie all de Johre ohne dich
su schnell verjange sin. Un doch han ich dich su vermess.
Kumm drink….
Eines Naachs hatt ich ene Draum: Ich loor‘ zoröck op ming Levve.
Do soh ich zwei Paar Foßspore em Sand.
Jo klor – en all de joode Zigge, jinge mer zwei Hand in Hand.
Doch wo wors do als et mir dreckig jing?
Ein Spor is do nor zo sin!
Ming Fründ, ich han dich leev, häs do zo mir jesaht,
loss dich nie allein, weed immer bei dir sin,
trag Dich durch de Driss, wo ein Spur nor is,
denn ich un du, un du un ich, mer sin unzertrennlich!
Kumm drink….
—
Alles Joode
© Sandra und Marc Dorlöchter, 2017
Ich han de Driss jepacht, ejal, wo ich jrad stonn.
En Hoor es en d‘r Zupp, wenn ich ens esse jonn.
Dat Jlass es ad halv leer, de Siel es mir zo schwer,
ach wenn doch nur et Levve leichter wör. Oh-je!
Zo vill es op d‘r Höff, de Nos es mir zo krumm.
Ich waad‘ ad op de Rent, dann bruch‘ ich nix mie dunn.
Fröher wor et besser, dat es janz jewiss.
Dat alles he es einfach nor noch Driss. Oh-je!
Alles Joode kütt vun bovve.
Maach dir nix drus, dat jeiht vorbei.
Alles Joode kütt vun bovve.
In jedem Eng steck ene Anfang drin.
Noh Rähn kütt immer widder Sunnesching.
Am Morje han ich Rögge, am Ovend dröhnt d‘r Kopp.
Ming Konto es em Minus, de Ahl es ad lang fott.
Dat es en Katastrophe, et rähnt ad wochelang.
Dat es bestemmp de Weltungergang. Oh-je!
Alles Joode ….
Sök un fing, jangk dinge Wääch,
Nor wenn do aankloppst weed dir opjemaht.
Uns Dom zeig‘ dir, wo ding Hülp herkütt –
luur zom Himmel un sing einfach met:
Alles Joode ….
—
Marie
Musik: Spotify, Amazon, Apple & Co.
© Sandra und Marc Dorlöchter, 2016
Hück is de Zick, jetz dr Moment,
Op den ich ming Levve lang jewaad han.
Als Prinz, Buur un Jungfrau, et es wie ne Draum,
Ich han et jeschaff, dem Himmel sei Dank.
Dat och et Sönnche sching,
De Minsche all löstig sin,
Kein Leid un och kein Ping
Uns ärgere kann.
Dat der Herrjott och laache deit,
Dat et joot wigger jeit,
Keine Terror uns schade deit,
Dröm bedde mer dich.
Ich stell Dir en Kääz op, Marie,
Denn d‘r Herrjott höt op Dich.
Ich stell Dir en Kääz op, Marie.
Do bess wie en Mamm för mich.
De aal Schmitzebill, die hätt esu vill
De Kopp voll Nut un voll Sorje.
Se kütt jede Dag, hätt dir alles gesaht,
Se weiß, dä Herrjott weed för se sorge.
Ich stell Dir en Kääz op…
Leev Marie, d‘r Herrjott es joot.
Dröm kumme mer, in Freud un in Nut.
Leev Marie, do bess för uns do.
Himmel un Äd sin hück noh.
Ich stell Dir en Kääz op…